دارِ نیْبر ترٲوٕم نظر

شہر مس نندرِ

زَا شُر زَن پتمِہ زَنمٕک خواب وُچھان

برارؠن ہنز أچھ رٲژ ہندس ۂٹس

مۄختہٕ مال ہش زۆتان

ہُتھ سڈکہِ دٔندِس پیٹھ میٖلہٕ کٔنؠ

پٲن پانس اندر ڈاپھ تر٘اوِتھ

یتھ کۆچس راتہٕ مگلَن ہیُند گوٗگوٗ

نندرِ گانگل کران

تہٕ آنگنُک یہِ کُل مٔنزمٔنز

ہُشار گٔژھت کاڈ ہیو کڈان

أچھ زورٕ زورٕمژرتھ شہر وچُھنک

وتن لؠکھت پرٔژن  مانہٕ دِنُک

تہٕ یٲگؠ کوتر بند ٹِھپہِ منٛز آزاد کرنک

صحیح وکھ چُھ یہوئے

رٲژ ہند پتمہِ  پۂرُک  ہنُدر  وآو

ییْلہٕ وٕشنِس سونچس سمکھان  چُھ

یاونُک دۄہہ چِھ یاد   پیوان

سیاه ژھاین چھِ أچھن

منٛز نٔو آش زائن لبان

اکھ نظم اکھ غزل اکھ خیال

طِلسمی یار تہٕ لول چُھ سیاه شہرٕچہِ

کۄچھِ منز تھنہٕ پیوان

     ازلہٕ لیٖکھت یہِ چُھسں تہٕ تی للوان

وٲنسِہ آدم چُھ زندگی للوان

أس چِھ چھکرنہٕ یواں ژھنڈاں طرفاتھ

دود کنرک تِہ بس أسی للوان

پوشہٕ برگےٕ چُھ سجد گاہ بمبرس

دگ چُھ پونپر شمع کُنی للوان

زتنہِ  کیۆم اکھ نپاں چُھ گٹہِ منز گاش

میّون صحرا یہ کِژھ  نمی  للوان

یُوس نہٕ اۆسی تۂ سُے وچھس منز رُۄچھ

یُسنہٕ ٲسی  تۂ سۄے کمی للوان

و گنِہ ونوُن کنن گژھاں کہتام

خٲبؠ شہرچ  سبز پٔری للوان

چاک سیٖنک أچھن  دِتُن خٲرات

داغ جگرک چُھ آخری للوان

شامۂ ژھاین یہِ کُس کران زنجورئ

خاب چشمن یہِ کُس ژھری للوان

پان  پنُنے چُھ  ازسَران  ما گٲ  مؠ

شار لیکھاں تۂ شٲعرِی للوان

 ناو تراون چُھ واو گراین ستٟھؠ

سون یوسف تِہ دراو باین ستٟھؠ 

سانِہ خابُک شہر چُھ تلپاتال

سون سودا چُھ نٲگراین ستٟھؠ

ہیر لاگان چِھ أستہِ آسمانس

أستہِ چھکرنہٕ یوان چِھ پاین ستٟھی

شینہٕ مٲنؠن چِھ سٖینہٕ زالاں أسی

دوس داری چَھ گرشمہٕ کراین ستٟھؠ

داستانا وُجارٕ خابن  ہنز

ننگہٕ نژُنا  کران چھ نیٲین ستٟھؠ

وٲنسہٕ وآدن شبیر ماگٲمس

شام وٲتتھ گِندُن چُھ ژھاین ستٟھؠ

نوزک مخمٔل خاب أچھن منٛز ژھۄہ ماران

رۄپہٕ تن بیہٕ کؠمخاب أچھن منٛز ژھۄہ ماران

ازتاں ہرمۄکھ بال وچھس منٛز رژھرٲوتھ

ازتاں ولرُک آب أچھن منٚز ژھۄہ ماران

ازتاں نُنٛدرش ناو مہٕ لیٖکھت سینس چُھم

ازتاں للِ ہیُند خواب أچھن منز ژھۄہ ماران

لولس کیٚاہ تدبیر کرو کیٚاہ تقدیرس

رسُتم بؠہٕ سۄہراب أچھن منٚز ژھۄہ ماران

شِنہٕ ژادر ژھیہِ پٲر تہٕ تارکھ ہانیمت

ہُندریومُت آفتاب أچھن منٚز ژھۄہ ماران

دریاون یُس یارٕبلن کُن وتھ ہاوان

ماگٲمس سُے آب أچھن منز ژھۄہ ماران

جسمُک پتھ کن روٗدمُت کرئنٛز

دگہِ ہنز کوندِ منٚز مۄ ژیومت سُرفۆل

تاپن ژٕہمٕژ گاسہٕ کرٔٹ

وتن پکان یمن نہ کانہہ منزل نہ کانہہ اَند

شہ کھالن چشمن سؠکھ زَن ڈَلان

امؠ بروںہہ کہٕ زمین شیرِ اۆل تہٕ نیگلاوِ

رُوحس کھیہِ آسمانُک پادر سہہ

سِریک نارٕ الاو دئ خونس دام

امہِ برونہہ زِ وَکھ نہناوِ

  آکھ پدؠن ہند مٚہ چُھ شرٚپُن چانین أچھن منٚز

گنٔگراین چانین پننہِ وجودچ دگ پٔشرِن

پکھن چانین لؠکھت تھاوُن پنٕن یہِ کربٔل داستان

ژٕ بلِبچُر باغُک رازدار

بۂ وتھرٕ وتھرٕ  گٲمژ تھرٕ پؠٹھ پوشِچ ژھاے

سون لول پتھ کالٕچ داستان

آوارٕ  زوٗن سیاه رٲژ ہنٚز تنہائی منز کُن زٔنؠ

بے ہؠس تصویر آسمانس اویزاں

سٲنؠ جسم سٲنؠ روح پھٕٹمِتی تارکھ

کمہٕ تام آسمانہٕ ؤسی پؠتھ زمٖنس چھکرنہٕ آمٕت

ونؠِ چھنٕہ أچھن ہنٚز رَکھن منٚز سریہ زِ 

خوابن ہندی پچھن کرن  ٹہراو

کوتُر یُوس کرتام شیش ہتھ

سوزاو آوی نہٕ واپس

سون لول زٕآبہٕ جوۓ بیون بیون

 وتو  دریاوس  شر٘پان

تہٕ دریاو یارٕبل مشرتھ بے پروائے

سٔدرس پان  اپران غٲب گژھان

زٕ دل دۄن سینن منٚز قٲد

 پننٔی پننٔی دگ للوان

فُچمژ ناو بے سۄکھ دوٗرِ دوٗرِ

 أکسی گاٹھس اپارِ یپُور کران

تھکتِھ ژھؠنتِھ بؠیہٕ واپس پنِّسی

بٔٹھس پیٹھ ڈاپھ تراوان